×××××××××××××
ကမ္မဌာန စရိယ ဆရာတော်ဘုရားသည် စာကိုသေချာဖတ်၏၊ တစ်ခေါက်၊ နှစ်ခေါက် သုံးခေါက်၊
အစကနေအဆုံး အဆုံးက အစ၊ တစ်လုံးချင်း တစ်ပိုဒ်ချင်း ကွက်ကွက်ကွင်းကွင်းမြင်အောင် သူ့၏ စက္ခုနှစ်ကွင်းအား လင်းအားပိုမိုတောက်ပစေရန် ထောက်ပံ့ပေးထားသော ကျွဲကော်ကိုင်း ပါဝါ မျက်မှန်ကြီးအား ပင့်လိုက်မလိုက်ချလိုက် စာတွေကို ဖတ်လိုက် အင်း၊ အဲ၊ အင်း အင်း ၊ အဲအဲ နဲ့ သက်ပြင်းများ အကြိမ်ကြိမ်ချလျှက် ဆုံးဖြတ်ရခက်နေ၏၊
ဖြစ်ပုံက သင်္ကြန်တွင်း ဆယ်ရက်တရားစခန်းလာဝင်ကြသော ယောဂီကောင်လေးတစ် ယောက်နှင့် ယောဂီကောင်မလေးတစ်ယောက် ပေါင်းနှစ်ယောက်တို့၏ အမှုဖြစ်ချေ၏၊ ပုံမှန်တွင် အမျိုးသား ယောဂီများကို တရားထိုင်ရာ ဓမ္မာရုံကြီး အရှေ့ဘက်တွင် ထားပြီး၊ အမျိုးသမီးယောဂီများ တရားထိုင်ရာ ဓမ္မာရုံကြီး အနောက်ဘက်တွင် အဆောင်များဖြင့်ထားလေ၏၊
တရားထိုင်သောအခါ တရားနာသောအခါ၊ ဆွမ်းစားကျောင်းမှာ ဆွမ်းစားသောအချိန်တွင်သာ အတူတကွ တွေ့မြင်ကြရလေ၏၊ သို့ကလို ရှိလရကား ဘယ်က ဘယ်လို စာပေးခြင်းအမှု ပြုစုဆောင် ရွက်ဖို့ အခွင်အလမ်းကား ဘယ်နေရာမှာ အကြွမ်းတ၀င်ဖြစ်လေရသနည်း၊
ကမ္မဌာနဆရာတော်ဘုရားကြီး တွေးရကြပ်လှချေ၏၊
“ဟဲ့ ဒီရည်းစား စာက ဘယ်နားမှာ ပေးလိုက်တာလဲ”
ကမ္မဌာန ဆရာတော်ကြီးသည် ယောဂီဒကာမလေးထံ စိုက်စိုက်ကြည့်ပြီး သကာလ မေးချလိုက်လေ၏၊
“မှန် မှန် လှပါဘုရား၊ မနက်အာရုဏ်ဆွမ်းစားအပြီး ရေနွေးခပ်တဲ့ နေရာမှာ ပေးလိုက်တာပါ ဘုရား၊”
“ဟေ-----------၊ ဆရာတော်ကြီးသည် သံရှည်ဆွဲလျှက်၊ အင်း ၊ အင်း၊ တစ်လုံးချင်း အင်းတွေချလျှက်၊”
“ဟဲ့ ဒကာ မင်းက ဘာလို့ပေးရတာလဲ၊ တရားထိုင်နေချိန် ဒီလို လုပ်ရသလား၊”
ကမ္မဌာနဆရာတော်ကြီးသည် ယောဂီဒကာလေးဘက် လှည့်ကာ မာန်သလိုလိုနဲ့ မိန့်ပြန်၏၊
“မှန်လှပါ မှန်လှပါ ဘုရား၊ ဒါက ရည်းစားစာ မဟုတ်ပါဘူး ဘုရား၊ တရားစာပါ ဘုရား၊”
“အရှင်ဘုရား၊ မယုံရင် သေချာ ဖတ်ကြည့်ပါ ဘုရား၊”
ယောဂီဒကာလေး သည် ၊ မိုးကြိုးပစ်တာကို ထန်းလက်နဲ့ကာသလို ကာနေပြန်သည်၊
သို့ကလို ယောဂီဒကာလေး လျှောက်ထားသမို့
ကမ္မဌာန ဘုန်းတော်ကြီးသည်လဲ အထက်က ပြောခဲ့သလို စာကို အထက်ကအောက် အောက် အထက် တလစပ် ဖတ်သော်လဲ အမှုကား အပြစ်ပေးရခက် ၊ မပေးရခက် ဖြစ်နေချေ၏၊
ယောဂီဒကာလေး ရေးပေးထားသော စာလွှာကလဲ ကြည့်ချေဦးလေ၊
“ကြည်သာရယ်၊ …….
သွားချင်တာက နာမ်၊ သွားနေဟန်က ရုပ်၊ ရီချင်ဟန်က နာမ်၊ ရီနေတာက ရုပ်၊ သူမဟုတ် ငါမဟုတ်၊ ဘာပဲ လုပ်လုပ် နာမ်နဲ့ ရုပ်ပါကွယ်၊
ဒါကြောင့် မင်းရဲ့ ရုပ်နာမ်အစဉ်မှာ ကိုယ့်ရဲ့ နှလုံးသားလေးကို မြှုပ်နှံပါရစေနော်၊”
ရုပ်နာမ်ကို အဟုတ်အမှန် ချစ်မြတ်နိုးတတ်တဲ့
“ကိုယ်၊”
***********************
No comments:
Post a Comment