************************
အညာဆိုတာ တမာတွေက လွှတ်ပေါ လွှတ်ပေါက်တာဗျ၊ ကျုပ်တို့ရွာဆိုတာလဲ အညာစာရင်းဝင်ဆိုတော့ တမာပင်တွေက ပေါမှပေါပဲ၊ ကိုယ်တိုင်မစိုက်ရပဲ သူအလိုလိုကို လမ်းဘေး ၀ဲယာမှာ တမာပင်တွေ တန်းစီနေတာ၊
အဲဒီလို တမာတန်းကြီးက ကျုပ်တို့ကျောင်းတက်နေတဲ့ ရွာဦးကျောင်း မုခ်ဦးဘေးကနေ ရွှာအ၀င် လမ်းအထိ တမျှော်တခေါ်ကြီးကို သဘာဝအတိုင်း ပေါက်နေတာရှိသေးတယ်။ တမာပင်တန်းထဲမှာ ကျောင်းမုခ်ပေါက်နားက တမာပင်ကြီး ဟီးဟီးထလို့၊ ထိုးထိုးထောင်လို့ ညအခါ လမသာပဲ လမိုက်ညများဆို ဘယ်သူမှ အဲဒီနားက တစ်ယောက်တည်း ဖြတ်ဖို့ စိတ်မကူးရဲဘူး၊
အဲဒီ တမာပင်ကြီး သရဲခြောက်တယ်လို့ သတင်းကလဲ အကြီးသားကလား၊ ဒါပေမယ့် အဲဒီ တမာပင်ကြီး သရဲခြောက်တဲ့ဆိုတဲ့ အခွင့်အရေးကို အပြည့်အ၀အသုံးချနေတာက ခက်ဝေတို့ ညီမ သုံး ယောက်ပေါ့၊
ကျုပ်တို့ရွာမှာက နွေအခါဆို ရေက ရှားမှရှားပဲ၊ ချိုးရေအတွက်ကတော့ မပူရပါဘူး၊ ရွာပတ် လည်က ရေကန်တွေမှာ သွားချိုးလို့ အဆင်ပြေတယ်၊ သောက်ရေနဲ့ သုံးရေအတွက်ကြတော့ ခက်ပြန် ရော၊ ရွာဦးဘုန်းကြီးကျောင်းထဲမှာ ရေတွင်းက သုံးတွင်းရှိပေမယ့်၊ ရေက နွေအခါဆို သိပ်မထွက် တောာ့ဘူး၊ တစ်ခါတစ်ခါ ဒေ၀ဒတ်ခေါင်းတောင် မြင်နေရတာ၊
အဲဒီတော့ ရေအတွက် မနက်ညနက်သန်ခေါင်း စောင့်ခတ်ရတာ၊ ဒါတောင် ရေက အထွက်နည်းလို့ ရိုးရိုးပုံးနဲ့ ခပ်မရ ငင်မရလို့ မိုလာပုံးခွံလေးတွေကိုကြိုးတပ် ရေစစ်ခပ်ရတာ၊ မိုလာပုံးနဲ့ ခပ်ရတာ ဆိုတော့ သိတဲ့ အတိုင်း တစ်ပုံးနဲ့ တစ်ပုံးက ရွာက ရွာလူကြီးအိမ်ကို ငွေမပေးပဲ မှတ်ပုံတင် လုပ်ခိုင်း သလောက် ကိုကြာတာ၊
ရွာဦကျောင်းထဲက ရေတွင်းသုံးတွင်းကတော့ ညအခါလသာသာဆို ရေတွေ ပြည့်ပြည့်နေ တတ်တယ်ဗျ၊ ညနက်သန်ခေါင် ဘယ်သူမှ ကျောင်းထဲမလာရဲတာလဲပါမှာပေါ့။ ကျောင်းမုခ်ဝက တမာပင်ကြီး ဟီးနေတာက သရဲကြောက်လို့လဲပါမှာပေါ့ဗျာ၊ အဲ အဲဒီသရဲကို မကြောက်ကြတဲ့ ခက်ဝေ သက်ဝေတို့ ညီမအမတွေကတော့ ညနက်သန်ခေါင်လဲ ရေလာခပ်သဗျာ၊ သူတို့ခပ်သွားရင် ကျောင်း အတွက် မနက်ဆရာတော် မျက်နှာသစ်ရေ၊ ဆွမ်းဟင်းပုဂံတွေ ဆေးဖို့ရေက အခက်တွေ့ရော၊
မနက်လင်းလို့ ဆရာတော်အတွက် ရေခပ်ထားပြီးမရှိရင် ကျောပြင်ကို ဗျောတင်တော့တာပဲ၊ တစ်ခါက နှစ်ခါ တစ်ရက်က နှစ်ရက်ဆိုတော့ ကျောပြင်တွေလဲ အညိုအမဲစွဲလို့ပါပဲ၊ တရားခံကို ရှာတော့ တွေ့ပြီး ဒါ--- ညက ခက်ဝေတို့ သက်ဝေတို့ ရေတွေခပ်ခပ်သွားလို့ တို့ကျောင်းသား ကိုရင် တွေရေမရတာ၊ တွေ့ကြသေးတာပေါ့ကွာ၊
ကျုပ်တို့ ဘုန်းကြီးကျောင်းသားတွေ စုပေါင်းစည်းဝေးပွဲလုပ်ပြီး တညီတစ်ညွှတ်တဲ ခက်ဝေတို့ သက်ဝေတို့ ညီအမတွေ ညနက်ပိုင်း ရေလာမခပ်ရဲအောင် သရဲခြောက်ပြဖို့ အဆုံးအဖြတ် တစ်ခုကို ချလိုက်တယ်၊
“ဟေ့ကောင် အောင်ကြီး မင်းက ကျောင်းမုခ်ဝက တမာပင်ကြီးပေါ်က တက်ပြီးစောင့်နေ၊ သူတို့ ညီအမရေလာခပ်တာနဲ့ စခြောက်တော့ တို့က ဆွမ်းစားကျောင်းနား မာလကာပင်အောက်က ကင့်စောင့် နေမယ်၊”
ဖိုးလုံးက အစီိအစဉ်ကို ပြောပြတယ်
“ကျုပ်ကလဲ အေးအေး ငါ ဘုရားဝတ်ပြုပြီးတာနဲ့ ဆရာတော်ကျိန်းရင် တမာပင်ပေါ် တက်နှင့်မယ်ကွာ၊ မင်းတို့က လမ်းသွား လမ်းလာတွေ ကင်းစောင့်ပေးဦး”
“အေးပါကွ၊ အေးပါ စိတ်ချအောင်ကြီး”
ကျုပ်တို့ဘုန်းကြီးကျောင်းသားတွေ အဲဒီညက ဘုရားတောင် ကောင်းကောင်း ၀တ်မပြုနိုင်ဘူး၊ ၀ုန်ဒိုင်း ၀တ်ပြုပြီး၊ ဆရာတော်က ဘီဘီစီ သတင်းနားထောင်ပြီးတော့ ကျိန်းတာနဲ့ ကျုပ်တို့တတွေ ကျောင်းမုခ်ပေါက်ဝက တမာပင်ကြီးဆီကို သုတ်ချေတင်တော့တာပဲ၊
တမာပင်ကြီးအောက်ရောက်တော့ အောင်ရွှန်းက “ ဟေ့ကောင် အောင်ကြီးရော့ကွ၊ ဒါလေး ယူသွား”
ဟ ဘာကြီးတုန်းကွ၊
“အိမ်က အဖွားလိပ်သောက်တဲ့ ပျောင်းဖူးဖက် ဆေးလိပ်ကြီကွ၊ အဖွားမသိအောင် ခိုးယူလာတာ၊ ရော့ဒါက မီးချစ်”
“ငါက ဒါကြီး ဘာလုပ်ရမှာလဲဟ၊”
“မင်းကလဲ အပကွာ၊ အဲဒါကြီးနဲ့ တမာပင်အပေါ်ကနေ မီးသရဲလုပ်ပြပေါ”့
“အေးအေး ပေါက်ပြီကွာ၊ ဒါဆို ငါတက်ပြီဟေ့၊ မင်းတို့လဲ ၊ မာလကာပင်ဆီ ကင်းဝတ်တော”့
“အေးအေး အိုကေ အိုကေ”
သူများကို ဒုက္ခပေးချင်နေလို့လား မသိပါဘူးဗျာ၊ ၀ါးနှစ်ပြန်လောက်မြင့်တဲ့ တမာပင် ထိပ်ဖျားကို ဘယ်လိုက ဘယ်လိုရောက်သွားမှန်းမသိဘူး၊ အခြေနေကြည့်လိုက်တော့ ပတ်ဝန်းကျင်တစ်ခုလုံးက ငြိမ်သက်လို့၊ သင်္ကြန်ပြီးမို့ထင်တယ်
ပုစင်းရင်ကွဲတွေကတော့ အော်နေကြတယ် ပွက်ပွက်ညံလို့၊ တစ် ချက်တစ်ချက် ရွာနောက်ပိုင်း သင်္ချိုင်းကုန်းဆီက ခွေးတွေ အူအူနေတော့ ကျောတော့ အချမ်းသားကလား၊
ကလုံ ကလောင်၊ ကလုံ ကလောင်၊
ဟ တမာပင်အောက်က အသံတွေကြားတယ်၊ ဘာပါလိမ့်၊ ငုံ့ကြည့်လိုက်တော့ ခက်ဝေနဲ့ သက်ဝေ ညီအမနှစ်ယောက် ထမ်းပုံးကိုယ်စီနဲ့ ရေခပ်လာနေပြီကိုး၊
“အင်း ဒင်းတို့ကို ဒီတစ်ခေါက်တော့ လွှတ်ပေးလိုက်ဦးမယ်၊ နေဦး နောက်တစ်ခေါက်မှ ပညာပြရမယ်၊” စိတ်ထဲက တွေးရင်း၊ အောင်ရွန်းပေးထားတဲ့ ပျောင်းဖူးဖက်ကြီးကို
မီးညှိလိုက်တယ်၊ တမာပင်ထိပ်ဖျားမှာ လေက တိုက်နေတော့ ပုဆိုးခြုံပြီး မီးကို ညှိယူရတယ်၊ ဟူး တော်ပါသေးရဲ့ မျက်ခုံး မွှေးတွေ မလောင်ကုန်လို့၊
ဟော ပြောရင်းဆိုရင် ခက်ဝေနဲ့ သက်ဝေ လာနေပြန်ပြီ၊ တမာပင်ကြီးအောက်ရောက်တော့ မယ်၊ ရောက်တော့မယ်၊ ရောက်လာပြီ ရောက်လာပြီ၊
ကွက်တိပဲဗျို့ ကျုပ်ကလဲ ဘယ်ရမလဲ သောက်နေတဲ့ ပျောင်းဖူးဖက်ကြီးကနေ မီးမီးရဲရဲ ကြီးတွေ ချွေချလိုက်တာ သူတို့အပေါ် တည့်တည့်မတ်မတ်ပဲ ကြွေကျသွားရော
“ အမေလေး---၊ အမလေးတော့ အဖေရေ လာကြပါဦး သရဲ သရဲ ၊ သရဲ”
ညီအမနှစ်ယောက် ဖနောက်နဲ့ တင်ပါး တစ်သားတည်းကြလို့ ပြေးလိုက်ကြတာ၊ ဂုံးဂွမ်း ဂုံးဂွမ်းနဲ့ သူတို့ ရေထမ်းပုံးတွေလဲ ပက်လန်ကို လက်လို့၊
ဟားဟား၊ ကျုပ်တစ်ယောက်တည်း တမာပင်ကြီးပေါ်မှာ တံတွေးတွေသီးလို့ ရီလိုက်ရတာ၊ ဟိုကောင်တွေ အောင်ရွှန်းနဲ့ ဖိုးလုံးကတော့ မလကာပင်အောက်မှာလား အိပ်ယာထဲရောက်နေပြီလား မတွေးတတ်တော့၊
“ ဟေ့ကောင် တမာပင်ပေါ်က ကောင်ဆင်းခဲ့စမ်း၊ ဘယ်သူလဲကွ၊ ငါ့သမီးတွေကို ခြောက်တာ ဘယ်သူလဲကွ၊ မင်းတော့လား အောက်ရောက်လို့ကတေ့ာ အမှုံ့ကို လုပ်ပစ်ပမယ်၊”
ဟာ ဟာ အဲဒါမှ ဒုက္ခပဲ၊ ခက်ဝေနဲ့ သက်ဝေတို့အဖေ ကိုတင်ဖေကြီး ၊ ဒီလူကြီးက လူကြမ်း စိတ်ကြမ်းကြီး၊ သူသမီးတွေကသာ လှတာ၊ ဒီလူကြီးစိတ်က လှတာမဟုတ်ဘူး၊ မထင်ရင် မထင်သလို အခွံနွှာပစ်မှာ၊
ဒါနဲ့ ကျုပ်လဲ အဲဒီညက တမာပင်ပေါ်မှာ မိုးလင်းမှာလားတွေးရင်း ၊ ကုတ်ကုတ်ကလေး ကွေးနေပြီး မလှုပ်ရဲဘူး၊
အောက်ကအော်နေတဲ့ ခက်ဝေတို့ အဖေပြန်သွားမှ ကျုပ်လဲအပင်ပေါ်က ဆင်းလာခဲ့ရတယ်။
တမာပင်ကြီးအောက်ရောက်လို့ ပုဆိုးပြင်ဝတ်လိုက်တယ်၊ ပြီးတော့ ကျောင်းဘက်ပြန်အိပ်ဖို့ ဟန်ပြင်လိုက်တယ်၊
“ဟေ့ကောင် နေဦး၊ ငါလဲလိုက်မယ်လေ”
အပင်ပေါ်တက်တုန်းက ငါတစ်ယောက်တည်းပါ၊ အခုက နှစ်ယောက်ဖြစ်နေပြီ ၊ ဘယ်သူပါလိမ့်၊ “ ဟ မင်းက ဘယ်သူမို့ ငါနဲ့ လိုက်မှာလဲကွ၊”
“ ဘယ်သူကမှာလဲ ငါက မျိုးမင်းလေကွာ၊ စိုးခိုင်တို့အကို မျိုးမင်းပေါ့ ကွ၊ မင်းမသိဘူးလား”
“အင်း စိုးခိုင်တို့ အစ်ကို မျိုးမင်းဆိုတာ ဒို့အနောက်ရပ်ထဲက၊ ဒေါ်ဒေါ်ဖားတို့ အိမ်နားက၊ ဟာ ဟုတ်ပြီ၊ အဲဒိ ကိုမျိုးမင်းက ဟိုတစ်ပတ်ကမှ ဓားခုတ်မှု ဖြစ်ပြီး ဆုံးလို့ ကျောင်းထဲလာထားပြီး သရဏဂုံ တင်လိုက်ရတဲ့-----“
“အဲ အဲ အဲတော့ အောင်မလေးဗျ၊ သရဲ သရဲ သရဲ”
“ ဟာ ဟေ့ကောင် ဘာဖြစ်တာလဲ ထတော့၊ အိမ်မက်တွေ မက်ပြီး ယောင်နေတာလား၊ လာ မိုးလင်းနေပြီ ဆရာတော်အတွက် မျက်နှာသစ်ရေနဲ့ ၊ ပုဂံတွေ ဆေးဖို့ ရေခက်ချေရအောင်”
“ အော် အေးအေး ၊ ဟူးးးးးးးးးးး တော်ပါသေးရဲ့”
ညက အဖြစ်တွေဟာ အိမ်မက်လာ တကယ်လား မကွဲပြားတော့၊ ဝေေ၀၀ါးဝါး၊ ဒါပေမယ့် အခုထက်တိုင် ပျောက်မသွား၊
************************
ရွှေမန်းသား
( အခုချိန်မှာတော့ ကျုပ်တို့ရွာလေးမှာ လျှပ်စစ်မီးတွေရ၊ ကတ္တရာလမ်းမကြီးတွေပေါက်၊ ရေအတွက် စက်ရေတွင်းတွေလဲ တူးထားသမို့ ရေအတွက် သရဲခြောက်စရာ မလိုတော့ဘူးပေါ့ ဗျာ)
No comments:
Post a Comment