ဘုရားကတပည့်တော်မိဘအိမ်ကဘုရားပါ။ဘုရားကိုအနေကဇာတင်သင့်မတင်သင့်သိချင်တာပါဘုရား။ ဘုရားအနေကဇာတင်ခြင်းရဲ့ အကျိုးကိုတပည့်တော်ကိုကျေးဇူးပြုပြီးမိန့်ကြားပေး ပါဘုရား။ပြီးတော့ တပည့်တော် တရားဂုဏ်တော် နှင့်သံဃာဂုဏ်တော်အကျယ်ကိုလည်းသိချင်ပါတယ် ဘုရား။ ဘုန်းဘုန်းအဆင်ပြေသလို fb ကနေကျေးဇူးပြုပါဘုရား။ တပည့်တော်မေးတာအမှားပါရင်ခွင့်လွှတ်ပါဘုရား။
အိအိလှိုင်
အနေကဇာတင်တာနဲ့ ပတ်သက်ပြီးပြောပြရင်အတိုဆုံးအဖြေကတော့ မြတ်စွာဘုရှင် ကိုယ်တော်မြတ် ဘုရားဖြစ်ပြီးလို့ ကိုယ်တော်မြတ်ကျင့်ခဲ့တဲ့ တရားတွေအတိုင်း သဗညုတဥာဏ်တော်ကြီးကို သိတော်တာရယ်၊ တကယ့် သံသရာကြီးကိုကျယ်အောင်ချဲ့တတ်တဲ့ တဏှာအစဖြာတဲ့ ကိလေသာတွေကို တွေ့လိုက်တဲ့အခါ စိတ်တော်ထဲ မှာတင်မကနှုတ်တော်ကပါ ဖွင့်ဟရွတ်ဆိုတဲ့ အနေကဇာတိ သံသာရံ အစဖြာတဲ့ ဂါထာတွေကို ရွတ်ဖတ်ပူဇော်တာပါ၊
တစ်ချို့က ပြောတတ်ကြပါတယ်၊ အနေကဇာတင်တယ်ဆိုတာဘုရားကို အသက်သွင်းတာတဲ့၊ ဒါဟာမှားယွင်းတဲ့ အပြောအဆိုတွေသာ ဖြစ်မှာပါ၊
ဘုရားကို အသက်သွင်းစရာမလိုပါဘူး၊ သုံးလောကထွဋ်ထား တန်ခိုးရှင်ဖြစ်သော ဘုရားကို မည်သူမှအသက်သွင်းစရာမလိုပါ။ အသက်သွင်းခြင်း လုပ်ငန်းဆိုတာ ဗုဒ္ဓဘာသာတို့ရဲ့ လုပ်ငန်းမဟုတ်ပါ။အနေကဇာတင်ခြင်းကို ဘုရားရှင်အား အသက်သွင်းတယ်လို့ မသုံးနှုံးသင့်ပါ။ သို့ဖြစ်၍ ဘုရားရှင်အား
အနေကဇာတင်ဖို့မလိုဟူ၍ကား မဆိုပါ၊ ရုပ်ပွားတော်များကို အသက်ဝင်အောင် အနေကဇာတင်မှု မတင်မှုသည်ပဓာနကျသည်တော့ မဟုတ်ပါ။ ဘုရားရှင်ကိုယ်တော်မြတ်ရဲ့ ရုပ်ပွါးတော်ကို မဟာပုရိသလက္ခဏာ ၃၂ပါးနဲ့ ညီညွတ်စွာ ပီပီပြင်ပြင် ဖြစ်နေပြီးတော့ စိတ်ထဲမှာ ကြည်ညိုဖွယ်ဖြစ်ပြီဆိုရင်ပူဇော်ကြရုံသာ။ ပူဇော်တိုင်း အကျိုးများနေမည်မှာ အမှန်ပင် ဖြစ်ပါတယ်။
အနေကဇာတင်ခြင်းဆိုတာကို အကျယ်ချဲ့ပြောရမယ်ဆိုရင်---
အနေကဇာတင်ခြင်း ဆိုသည်မှာရှေးရှေးဆရာတော် သံဃာတော်များက ဘုရားရှင်ကိုယ်တော်မြတ် ဘုရားဖြစ်စရဲ့ နေ့တွေ၊ ညတွေမှာအနေကဇာတိသံသာရံ၊ ပဋိစ္စသမုပ္ပါဒ်၊ ယထာဟဝေဂါထာများဖြင့် ဘုရားရှင်ကိုယ်တော်မြတ် တနေ့လုံးတညလုံး သီတင်းသုံးသွားသော အခြင်းအရာကို ပြန်လည်အောက်မေ့၍ ဗောဓိသတ္တာဟ၊ ပလ္လင်္က သတ္တာဟကိုကြည်ညိုသောအနေဖြင့် ပူဇော်ကြခြင်း ဖြစ်ပါတယ်။
အနေကဇာတင် ရွတ်ဖတ်မှုနှင့်ရည်ရွယ်ချက်
(က) အနေကဇာတိ သံသာရံ၊ သန္ဓာ ၀ိဿံ အနိဗ္ဗိသံ။ ဂဟကာရံဂဝေသန္တော၊ ဒုက္ခာ ဇာတိ ပုနပ္ပုနံ။
(ခ) ဂဟကာရက ဒိဋ္ဌော သိ၊ ပုန ဂေဟံ န ကာဟသိ။ သဗ္ဗာ တေဖာသုကာ ဘဂ္ဂါ၊ ဂဟကူဋံ ၀ိသင်္ခတံ။ ၀ိသင်္ခါရ ဂတံ စိတ္တံ၊ တဏှာနံ ခယ မဇ္ဈဂါ။ ဤဂါထာတို့ဖြင့်အစချည်၍ သံဃာတော်များမှ ရွတ်ဖတ်ပူဇော်ပြီးသောအခါ “အ၀ိဇ္ဇာပစ္စယာ သင်္ခါရာ” ဆိုတဲ့ ပဋိစ္စသမုပ္ပါဒ်အနုလောမကို ရွတ်ဆိုတော်မူကြပါတယ်။ အဲဒီနောက်မှာတော့ “အ၀ိဇ္ဇာယတွေဝ အသေသ ၀ိရာဂ နိရောဓာ”အစရှိသော ပဋိစ္စသမုပ္ပါဒ် ပဋိလောမကို ရွတ်တော်မူကြပါတယ်။ ထို့နောက် “ယဒါ ဟဝေ ပါတု ဘ၀န္တိဓမ္မာ” အစရှိသော သုံးဂါထာကို ရွတ်ဆိုတော်မူကြရပါတယ်။ အဲဒီလို အစဉ်အစဉ်ဖြင့် ။
၁။ အနေကဇာတိ သံသာရံ၊ ၂။ ပဋိစ္စသမုပ္ပါဒ်အနုလောမ နှင့် ပဋိလောမ ၃။ ယဒါ ဟဝေ အစရှိတဲ့ ဥဒါန်း သုံးဂါထာ ဒီအစီအစဉ်သုံးခုကို ဘုရားရှေ့တော်မှောက်မှာသံဃာတော်များ လက်အုပ်ချီပြီး ရွတ်ဆိုမှု့များဟာ ဘယ်လို အဓိပ္ပါယ်ရှိလဲ မေးရင်
.......ဘုရားရှင်ကိုယ်တော်မြတ်မဟာသက္ကရာဇ် (၁၀၃) ခုနှစ် ကဆုန် လပြည့်နေရဲ့ ညနေခင်း၊ ဗောဓိပင်ရင်းမှာ နေမ၀င်မှီ ဒေ၀ပုတ္တမာန်ကိုအောင်မြင်တော်မူခဲ့ပါတယ်။ ညဦးယံကာလ ပုဗ္ဗေနိဝါသာနုဿတိ အဘိညာဉ်နှင့် သန်းခေါင်ယံကာလဒိဗ္ဗစက္ခု အဘိညာဉ် တို့ကို ရတော်မူခဲ့ပါတယ်၊ လင်းအားကြီးကာလ ကဆုန်လပြည့်နေ့ည မကုန်သေးမှီ အချိန်မှာ“အာသ၀က္ခယဥာဏ်”ကို ရ၍ ဘုရားအဖြစ်သို့ ရောက်ရှိတော်မူခဲ့ပါယတယ်၊
ဘုရားအဖြစ်သို့ရောက်ပြီး လပြည့်ကျော်တရက်နေ့ ကူးသောအချိန်ဗောဓိပင်ရင်းမှာ သီတင်းသုံး ထိုင်နေတော်မူတဲ့ ဘုရားရှင်ဟာ ကမ္ဘာအသင်္ချေအနန္တက နှိပ်စက်လာတဲ့ကိလေသာတွေကို အောင်မြင်ခဲ့ပြီဖြစ်တဲ့ ဘုရားရှင်သည် ၀မ်းသာတော်မူလွန်းလို့ ဥဒါန်းကျူးရင့်တော်မူပါတယ်။
ဗုဒ္ဓကျူးရင့်ခဲ့တဲ့ ဥဒါန်း(၂) မျိုး
ဘုရားရှင် ကျူးရင့်တော်မူသော ဥဒါန်းမှာ နှစ်မျိုးရှိပါတယ်။
၁။ မနသာ“၀၀တ္ထပိတ”ဥဒါန်း(စိတ်ထဲမှာသာလျှင် ကျူးရင့်သော ဥဒါန်း)
၂။ ၀စသာ ဥဒါန်း (စိတ်ထဲတွင်မကပဲ နှုတ်ကပါ ထုတ်ဖော်၍ ကျူးရင့်သော ဥဒါန်း) ဟူ၍ နှစ်မျိုးဆိုပြိး နှစ်မျိုးရှိပါတယ်။ဥဒါန်းဆိုတာ
အိုးတလုံးထဲ ဆီထည့်(သို့မဟုတ်) ရေထည့်၊ ထည့်ရင်းထည့်ရင်းနဲ့ ပြည့်ပြီးတော့ နှုတ်ခမ်းရောက်လို့ အိုးထဲမှာ မဆန့်ပဲ နှုတ်ခမ်းကနေ စီးပြီးတော့ လျှံကျသွားတဲ့အခါ အိုးတအိုးလုံး အတွင်းရော အပြင်ပါ ဆီတွေ ရေတွေ စိမ့်ပြီးတော့ စိုနေသလို ဘုရားရှင်ရဲ့နှလုံးအိမ်မှာ စိမ့်ပြီးတော့ထားတဲ့ အရဟတ္တမဂ်၊ အရဟတ္တဖိုလ်နဲ့ယှဉ်တဲ့ ပီတိများ သည် ကိုယ်တော်ရဲ့နှလုံးတော်မှာ မဆန့်တော့တဲ့ အတွက်ကြောင့် နှုတ်တော်က လျှံထွက်လာသော ၀စသာဥဒါန်း၊ နှုတ်တော်ကမထွက်သေးခင် စိတ်ထဲမှာပဲ ရွတ်ဆိုနေတဲ့ မနသာဥဒါန်း ဥဒါန်းနှစ်မျိုး ဖြစ်ပေါလာတာပါ။
လပြည့်ကျော်တရက်နေ့ အာရုဏ်တက်တဲ့အခါမှာဘုရားရှင်ကိုယ်တော်မြတ် စိတ်ထဲမှာ ကျူးရင့်သော ဥဒါန်းဟာ “အနေကဇာတိ သံသာရံ” ဂါထာနှစ်ဂါထာဖြစ်ပါတယ်။ဘုရားရှင် ရင်ထဲ နှလုံးထဲ ကနေပြီးတော့ ရွတ်ဆိုနေခဲ့တာ လပြည့်ကျော်တရက်နေ့ မနက်ခင်းအာရုံဦး “အနေကဇာတိ သံသာရံ” နဲ့ နေပါတယ်။ တနေ့လုံးလည်းပဲ “အနေကဇာတိသံသာရံ” နဲ့ နေတယ်။လပြည့်ကျော်
တစ်ရက်နေ့ တနေ့လုံး“အနေကဇာတိသံသာရံ” ကို နုတ်ကနေမဆိုပဲနဲ့ စိတ်ထဲမှာ ကျူးရင့်၍နေတော်မူပါတယ်။ လပြည့်ကျော် တစ်ရက်နေ့ ညဉ့်ဦးယံအရောက်မှာ နုတ်မှ ထုတ်ဖော်၍ အ၀ိဇ္ဇာပစ္စယာသင်္ခါရာ၊ သင်္ခါရပစ္စယာ ၀ိညာဏံ၊ ၀ိညာဏပစ္စယာ နာမရူပံ၊ နာမရူပပစ္စယာ သဠာယတနံ၊ သဠာယတနပစ္စယာဖေဿာ၊ ဖဿပစ္စယာ ဝေဒနာ၊ ဝေဒနာပစ္စယာ တဏှာ၊ တဏှာပစ္စယာ ဥပါဒါနံ၊ ဥပါဒါနပစ္စယာ ဘဝေါ၊ ဘ၀ပစ္စယာဇာတိ၊ ဇာတိပစ္စယာ ဇရာမရဏံ၊ သောက ပရိဒေ၀ ဒုက္ခ ဒေါမနဿု ပါယာသာ သမ္ဘ၀န္တိ ဧ၀ မေတဿ ကေ၀လဿ ဒုက္ခက္ခန္ဓဿသမုဒယော ဟောတီတိ.. ဟူသော ပဋိစ္စသမုပ္ပါဒ် “အနုလောမ” ကို ကျူးရင့်တော်မူပါတယ်။
အဲဒီနောက် အ၀ိဇ္ဇာယတွေဝ အသေသ၀ိရာဂ နိရောဓာ သင်္ခါရ နိရောဓော၊ သင်္ခါရနိရောဓာ ၀ိညာဏနိရောဓော၊ ၀ိညာဏနိရောဓာ နာမရူပ နိရောဓော၊နာမရူပနိရောဓာ သဠာယတန နိရောဓော၊ သဠာယတန နိရောဓာ ဖဿနိရောဓော၊ ဖဿနိရောဓာ ဝေဒနာနိရောဓော၊ဝေဒနာ နိရောဓာ တဏှာနိရောဓော၊ တဏှာ နိရောဓာ ဥပါဒါန နိရောဓော၊ ဥပါဒါန နိရောဓာ ဘ၀နိရောဓော၊ဘ၀နိရောဓာ ဇာတိနိရောဓော၊ ဇာတနိရောဓာ ဇရာ မရဏံ၊ သောက ပရိဒေ၀ ဒုက္ခ ဒေါမနဿု ပါယာသာ နိရုဇ္ဈန္တိ၊ဧ၀ မေ တဿ ကေ၀လဿ၊ ဒုက္ခက္ခန္ဓဿ နိရောဓော ဟောတီတိ ဟူသော ပဋိစ္စသမုပ္ပါဒ် “ပဋိလောမ” ကို ဆက်လက်၍ကျူးရင့်တော်မူခဲ့ပေသည်။ ပဋိစ္စသမုပ္ပါဒ် အနုလောမ နှင့် ပဋိလောမ ကို အပြန်ပြန်အလှန်လှန်ဆင်ခြင်သုံးသပ်တော်မူပြီးသောအခါ
(က) ယဒါ ဟဝေ ပါတု ဘ၀န္တိ ဓမ္မာ၊ အာတာပိနော ဈာယတော ဗြဟ္မဏဿ။အထဿ ကင်္ခါ ၀ပယန္တိ သဗ္ဗာ၊ ယတော ပဇာနာတိ သဟေတု ဓမ္မာ။
(ခ) ယဒါ ဟဝေ ပါတု ဘ၀န္တိ ဓမ္မာ၊ အာတာပိနောဈာယတော ဗြဟ္မဏဿ။ အထဿ ကင်္ခါ ၀ပယန္တိ သဗ္ဗာ၊ ယတော ခယံ ပစ္စယာနံ အဝေဒိ။ (ဂ) ယဒါ ဟဝေ ပါတု ဘ၀န္တိဓမ္မာ၊ အာတာပိနော ဈာယတော ဗြဟ္မဏဿ။ ၀ိဓူပယံ တိဋ္ဌတိ မာရသေနံ၊ သူရိယောဝ သြဘာသယ မန္တလိက္ခံ။………………..ဟူသောသုံးဂါထာကို ကျူးရင့်တော်မူခဲ့ပါတယ်။
ပဋိစ္စသမုပ္ပါဒ် နှင့် ယထာဟဝေ အစရှိသော ဂါထာတို့ကိုဥာဉ့်ဦးယံမှာ နုတ်မြွက်ပြီးတော့ ရွတ်ဆိုကျူးရင့် တော်မူပါတယ်။ ဥာဉ့်အလယ်ပိုင်း မဇ္ဈိမယံမှာလဲဒီအတိုင်းပါပဲ။ ဥာဉ့်ရဲ့ နောက်ပိုင်း မိုးသောက်ယံ ကျပြန်တော့လည်း ဒီအတိုင်းပင်
လပြည့်ကျော်တရက်နေ့တညလုံး ဘုရားရှင်ဤကဲ့သို့ နေတော်မူပါ တယ်။ လပြည့်ကျော်တစ်ရက်နေ့ နေ့နဲ့ည အကုန်၊ လပြည့်ကျော်၂ ရက်၊ ၃ ရက်၊ ၄ ရက်၊ ၅ ရက်၊ ၆ ရက် ၇ ရက်နေ့ ဤ (၇) ရက်နေ့ ညနေခင်းအထိ ဘုရားရှင်ကိုယ်တော်မြတ်ဖလသမာပတ်နဲ့ချည်း ချမ်းသာ စွာ နေတော်မူပါတယ်။ လပြည့်ကျော် ၇ ရက်နေ့ ညပိုင်းအရောက်မှာမြတ်စွာဘုရားဆင်ခြင်ပုံ တစ်မျိုး ပြောင်းသွားပြီးတော့ “အ၀ိဇ္ဇာ ပစ္စယာ သင်္ခါရာ” ဆိုတဲ့ပဋိစ္စသမုပ္ပါဒ် “အနုလောမ” ကို ဆင်ခြင်တော် မူပါတယ်။ အဲဒီနောက်မှ ယထာဟဝေ အစရှိတဲ့
ပထမဂါထာကိုဆင်ခြင်တော်မူတယ်။ လပြည့်ကျော် (၁) ရက်နေ့ရဲ့ ဥာဉ့်အလယ်ပိုင်း မဇ္ဈိမယံမှာ အ၀ိဇ္ဇာယတွေဝအသေသ ၀ိရာဂ နိရောဓာ ဟူသော ပဋိစ္စသမုပ္ပါဒ် “ပဋိလောမ” ကို ဆင်ခြင်တော်မူတယ်။ ထို့နောက်ယထာဟဝေ ဒုတိယ ဂါထာ ကို ဆင်ခြင်တော်မူတယ်။ မိုးသောက်ယံမှာ ပဋိစ္စသမုပ္ပါဒ် “အနုလုံ” နှင့်“ပဋိလုံ” ကို အပြန်ပြန်အလှန် လှန် နှစ်ခုစလုံး ဆင်ခြင်တော်မူပြီးတော့ “ယထာဟဝေ” တတိယဂါထာကိုဘုရားရှင် ကျူးရင့်တော် မူပါတယ်။ ဒါကိုပဲ “ပလ္လင်္ကသတ္တာဟ”
လို့ခေါ်ပါတယ်။ ဗောဓိပင်ရင်းမှာတင်ပျဉ်ခွေပြီးတော့နေခဲ့တဲ့ အတွက်ကြောင့် “ဗောဓိသတ္တာဟ” လို့လဲ ခေါ်ပါတယ်။ ဗုဒ္ဓါဘိသေက=အနေကဇာတင်ခြင်းလို့ဆို သော်လည်း ဘုရားအား ဘိတ်သိတ်သွင်းခြင်း မဟုတ်ကြောင်း စာဖတ်သူ အများ သိထားသင့်ပါတယ်၊ဘုရားရှင်ကိုယ်တော်မြတ် ဘုရားဖြစ်စရဲ့ နေ့တွေ၊ ညတွေမှာ အနေကဇာတိသံသာရံ၊ ပဋိစ္စသမုပ္ပါဒ်၊
ယထာဟဝေ ဂါထာတွေနဲ့ ဘုရားရှင်ကိုယ်တော်မြတ် တနေ့လုံး တညလုံး သီတင်သုံးသွားသော အခြင်းအရာကိုအောက်မေ့ပြီး ဗောဓိသတ္တာဟ၊ ပလ္လင်္ကသတ္တာဟကို ကြည်ညိုတဲ့ အနေနဲ့ သံဃာတော်များမှ “အနေကဇာတိသံသာရံ”ရွတ်ဖတ်ပူဇော်ခြင်းကို အနေကဇာတင်ခြင်း ဟု ခေါ်ကြပါတယ်၊
သံဃာတော်များ မပါဘဲ ကိုယ့်ဘာသာကိုယ် ဤအနေကဇာတင်စာများအလွတ်ကျက်၍ ကိုယ်တိုင် နေ့တိုင်းနေ့တိုင်း ရွတ်နေရင်လည်း အနေကဇာတင်မှု့ ပြီးမြောက်ပါတယ်။သံဃာတော် အရှင်မြတ်များ ပင့်ပြီး ရွတ်ဆိုသောအခါ ပိုပြီးတော့ ဌာန်ကရိုဏ်းပယတ် ပီပီပြင်ပြင်ကြည်နူးရန်အလို့ငှါ ဘုရားရှင်ကိုယ်တော်မြတ်၏ ရုပ်ဆင်းတုအသစ် ဖြစ်သစ်စကို ဘုရားရှင်ကိုယ်တော်တိုင်ကျူးရင့် ခဲ့တဲ့ ဥဒါန်းများနှင့် ပြန်လည်ပူဇော်ရန် သံဃာတော်များ ပင့်ဖိတ်၍ အနေကဇာတင်ကြခြင်းဖြစ်ပါတယ်၊
အဲဒီတော့ အနေကဇာတင်ခြင်းနဲ့ပတ်သက်မပြိး ကောက်ချက်ချရမယ်ဆိုရင် မြတ်စွာဘုရားရှင်အား ကြည်ညိုသဒါစိတ်နဲ့ တင်မယ်ဆိုရင်တင်နိုင်ပါတယ်၊ ဘုရားရုပ်ပွားတော်အား အသက်သွင်းတယ်ဆိုတဲ့ အယူအဆနဲ့တော့ အနေကဇာ မတင်သင့်ပါ၊အနေကဇာတင်ခြင်းအမှုပြုရင် ရရှိမယ့် အကျိုးကတော့ ဘုရားရှင်ဘုရား ပို၍ကြည်ညို သဒါပွားလာခြင်းနဲ့သံဃာတော်တွေအား ဆွမ်းအစရှိတဲ့ ဒါနပ္ပည်းများ ပေးလှူရသမို့ ဒါနအကျိုးကျေးဇူးများ ရရှိမှာမလွယ်မသွေ ခံစားရပါမည်အကြောင်း ဖြေကြားလိုက်ပါတယ်၊
တရားဂုဏ်အကျယ်နဲ့ သံဃာဂုဏ်တော်များအကြာမီဖြေကြားပေးပါမယ်၊
ရွှေမန်းသား အရှင်အကုင်္ရ
ခေတ္တ အနမလိုင်း တက္ကသိုလ်
အိန္ဒိယ
No comments:
Post a Comment