ထိုသဲချောင်းလေးကို ဖြတ်ပြီး ဘုန်းတော်ကြီးကျောင်းအရှေ့တည့်တည့် ဆက်သွားလျှင် မြို့ဘက်မှလာတတ်သောဧည့်သည်၊ ရွာမှ မြို့ဆီကို ဈေးဝယ်သွား၍ ပြန်လာတတ်သော ခရီးသည်များကို ကြည်ကြည်လင်လင် မြင်တွေ့နိုင်သော ကုန်းကမူလေး တစ်ခု ရှိလေ၏၊ ကုန်းကမူလေးဘေးတွေင် အရိပ်ကောင်းသော ပင်ညောင်ပင်ကြီး တစ်ပင်က ထီးထီးမားမား အရိပ်မိုးပေးထားလေ၏၊
ထိုပင်ညောင်ပင်ကြီး အရိပ်မိုးပေးထားသော ကုန်းကမူလေးပေါ်သို့ သူ့ချစ်သူ မြို့ တက်သွားကတည်းက ညနေနေ၀င်ရီတယော ရောက်တိုင်း တစ်ရက်မပျက် ရက်ဆက် သွားနေတတ်သော မိမုန်းဆိုသော မိန်းကလေးတစ်ယောက်ရှိခဲ့ဘူး၏၊
တစ်နေ့ ကျောင်းမြောက်ဘက်တွင် ဖြတ်အသွား မိမုန်းနဲ့ ကျောင်းထိုင်ဆရာတော် ဘုရား ပက်ပင်းတိုးသွား၏၊
ဆရာတော်ဘုရားမှ “ ဟဲ့ မိမုန်း နင့်မလဲ မဖြစ်နိုင်တာကြီးကို မျှောင်လင့်ချက် မထားနဲ့လေကွယ်၊ လက်လျှော့လိုက်ပါ ကွဲ့” ဟု ကရုဏာဖြင့် မိန့်လေသည်၊
မိမုန်းမှလည်း “တင်းပါး ဘုရား” ဟု တစ်ခွန်းသာ လျှောက်ထားပြီး သူလမ်း၊ သူဦးတည်ရာသို့ ဆက်လက်ထွက်သွားသည်၊
ထိုနေ့ညနေက ရွာမှာ မိုးကြီးလေကြီးကျပြီး အိမ်တွေတော်တော်များများ ပြိုကြ၏၊ သစ်ပင်တွေကြိုးကျ၏၊ မိုးတွေ တဒီးဒီးရွာချတာကြောင့် ဘုန်းတော်ကြီးကျောင်း ဘေးက သဲချောင်းလေးလဲ ရေအပြည့်နဲ့ တဟီးဟီး စီးမျောခဲ့သည်၊
မိမုန်းတစ်ယောက်ကား ထိုညကရွာဆီကို ပြန်ရောက်မလာခဲ့၊ နောက်တစ်နေ့မနက် မိုးစင်စင်အလင်းတွင် မိမုန်းတစ်ယောက်သူသွားနေကြ၊ ထိုင်မျှော်နေကြ ရွာထိပ်က ကုန်းကမူလေးပေါ်တွင် ရှိလိုရှိငြား သွားရောက်ရှာကြသော်လည်း မိမုန်းကား ဘယ်ဆီရောက် မှန်းမသိ ပျောက်ခြင်းမလှ ပျောက်နေသည်၊
ထိုအချိန်မှစ ထိုကုန်းကမူလေးပေါ်ကို ရွာသူ၊ရွာသား တော်တော်များများ မသွားရဲကြတော့၊
ရွာသူ၊ရွာသားများနှင့် ရွာဦးကျောင်းဆရာတော်ဘုရားမှ မိမုန်းဘ၀နိဂုံးချုပ်ဆုံးသွား သော် လည်း၊ အလွမ်းနိဂုံးပါ ထပ်ဆင့်ချုပ်ဆုံးစေရန် ရည်သန်၍ ထိုနေရာလေးတွင် စေတီလေးတစ်ဆူ တည်ထားပေးလိုက်သည်၊
ယခုအခါ ထိုစေတီလေးသည်၊ လွမ်းစေတီ။
ယနေ့တိုင် ရွာကလူတိုင်း ပါးစပ်ဖျားတွင် လွမ်းစေတီအကြောင်းကို စကားစပ်မိတိုင်း သိုင်းသိုင်းဝိုင်းဝိုင်း ပြောမိတတ်ကြသည်၊
အော် လွမ်းစေတီ။ ။
ရွှေမန်းသား အရှင်အကုင်္ရ
၁၀.၃.၂၀၁၃
ခေတ္တ အိန္ဒိယ၊ အနမလိုင်းတက္ကသိုလ်၊
No comments:
Post a Comment