အရာရာက အဆင်မပြေ
နှစ်လတာ ခွဲထားခဲ့တဲ့ အခန်းထဲမှာလဲရှုတ်ပွ
မီးဖိုချောင်လေးထဲက ချက်ပြုတ်စရာတွေက နေရာမကျ
နေရာချဖို့
ရှင်းရလင်းရ
ပါလာတဲ့ ပစ္စည်း စားစရာ အခြောက်အခြမ်းတွေနဲ့
ဝေငှ နေရာချ လက်တွေလဲ ပေပွ ဆီတွေလဲ ဗလဗွ
ရောက်စမို့ ထင်တယ် အမေ
နံက်ခင်း လင်းတော့ သားချက်တဲ့ ဟင်းက
ပေါ့သလိုသလို ငံသလိုလို ချိုသလိုလို ခါးသလိုလို
ဆားခတ်တော့ နွင်းမေ့ နွင်းထည့်တော့ အချိုမှုံ့မပါ
ချိုတာချို ခါးတာခါး လိုတာလို များတာများပေါ့
ရောက်စမို့ ထင်တယ် အမေ
ခဏတာခွဲခွါခဲ့တဲ့ ကျောင်းတော်ကြီးက စိမ်းလို့ရွှေလို့
အရင်လို အသားကျဖို့ အချိန်တစ်ခုတော့ လိုနေသေး
ရောက်စမို့ ထင်တယ်အမေ
“ရာသီဥတုပူသည် လေငြိမ်နေ၏”
ရေသောက်လဲ သောက်တိုင်းမ၀ ရှတတ
ရောက်စမို့ ထင်တယ် အမေ
ရွှေပြည်တော်ကို လွမ်းရ ရွှေပြည်တော်ကို တမ်းတ
မှန်းဆပြီး ဖုန်းဆက် ဗိုင်ဘာနဲ့
စကားပြော အကြားသံစဉ်မှာ မျှောမလို့ကြံကာ ရှိသေး
ဟလို ကြားလား ဟလို ကြားလား
ကြားလား ကြားလားနဲ့
ဝေးကွာခြင်းတံခါးက တစ်စထက် တစ်စ မှုံဝါးလို့
ရောက်စမို့ ထင်တယ်အမေ
နေလဲပူတယ် ရင်လဲပူတယ်
ရင်မှာ ဟာတာတာနဲ့ တစ်ခုလို အပ်နေလို့
ကောင်ကင်မော့ကြည့်တော် နေမင်းကြီးက ပူသလား
အောက်ကို ငုံ့ကြည့်တော့လဲ
ပူတာပါပဲ အမေ
ရောက်စမို့ ထင်တယ် အမေ ။ ။
သစ္စာမိုးဝေ
၂၈.၄.၂၀၁၄
( နှစ်လတာအလည်သွားခဲ့တဲ့ ရွှေပြည်တော်က အိန္ဒိယအရောက် တို့ထိမိတာလေးပါ)
No comments:
Post a Comment